كتير من الناس بتسأل عن العقاقير وزيادة الوزن, وهل فيه ادويه ممكن تتسبب فى زيادة الوزن كآثار جانبيه لهذه الأدويه ؟؟ ولا لا, وما المقصود بفاتحات الشهيه ؟؟ كتير اوي من الناس يقولو انهم رايحين للدكتور عشان اجيب فاتح للشهيه, هل فعلاً الادويه المكتوب عليها فواتح شهيه فعلاً بتفتح الشهيه, وهل هي بتشتغل على المخ ولا على المعده ؟؟
أول سؤال عن العقاقير وعلاقتها بزيادة الوزن, طبعاً أشهر دواء معروف لزيادة الوزن هو الكورتيزون والي ياخده يقلك انا خايف من زيادة الوزن, ايه الى ممكن ننصح بيه للي بياخد الكورتيزون عشان وزنه.
اولاً الكورتيزون بيزود الوزن بعدة طرق ؟؟
1- ان الكورتيزون بطبيعة عمله كدواء بيساعد على إختزان الميه والسوائل فى الجسم, فأي انسان بياخد كورتيزون سواء اقراص او حقن بيلاحظ مع مرور الوقت ان جسمه بدأ يورم, ايديه تورم, سعات يقلك الصبح انا مابقدرش الدبله قافله على ايديا, او اجي البس الشوز الاقي رجليا ورمه, واحياناً نلاقي فيه توريم خفيف تحت العين, مش كدا وبس ده كمان الكورتيزون بيحول البروتينات الي دهون عن طريق الكبد, وبيساعد على إعادة توزيع الدهون فى جسم الإنسان, يعني تلاحظ إن الى بياخد كورتيزون لفترات طويله بدأ يبقي وشه مدور ومليان دهن وبنلاقي ان اصبح عنده دهون فى منطقة الأرداف وفي مناطق البطن.
فى الاساس لما نتكلم عن الكورتيزون هو غلط بل الكورتيزونات لأن الكورتيزونات ليها أنواع كتير جداً جداً ولازم ناخد النوع المحدد لينا ومش بإراده شخصيه أو حكم شخصي إنك خلاص إستقريت إنك هتاخد كورتيزون لإن زي ما قلنا أنواع الكورتيزونات كتير.
المهم اي حد بياخد كورتيزون بقله لو سمحت قل الملح بتاعك خاااااااالص فى الاكل سواء الملح الظاهر او الملح الخفي يعني شيل الملاحه الموجوده فى السفره, حاول ماتشتريش الملح, حاول ماتضيفش ملح على الخضار الى بتاكله لإن بالفعل الخضار بيكون فيه ملح طبيعي, إبتعد عن الاكلات الى فيها ملح خفي زي الجبنه الرومي او المخللات زي الصويا والاكلات الصيني لإن الحجات دي بيكون فيها نسبه عاليه جداً من الصوديوم كذلك الكاتشب والمايونيز.
2- مارس رياضه وحركه بإستمرار عشان مايؤديش تناول الكورتيزون الى تراكم الدهون فى جسمك.
3- إبتعد عن الدهون خصوصاً الدهون المشبعه زي الزبده والقشده والجبن الدسمه زي الشيدر والجبن المطبوخه بصفه عامه, إبتعد كمان عن اللحوم الدهنيه وحتي اللحوم الحمراء بدون دهن ظاهر بيكون فيها نسبه عاليه من الدهون زي الحمام وزي البط والوز والكبد والكلاوي والمخ.
واهم مافي الموضوع لعب الرياضه والحركه المستمره لإن على مدار الوقت الكورتيزون بيسبب هشاشه فى العظام وبالتالي الحركه والرياضه بتساعد على تقوية العضلات ومنع هشاشة العظام.
