النهارده لازم نصحح المفاهيم الخاطئه الي بتخص العناية بالشعر وطبعاً فيه كلام كتير كنا بنسمعه وإحنا صغيرين يتعلق بالشعر والعنايه بيه وللإسف معلومات خاطئه, لسه بنسمع ناس بتقول كلام غلط فحبيت أتكلم عن بعض المعلومات الي تتعلق بالشعر الى كنا بنسمعها وتوارثتها الأجيال غلط.
المعلومة الخاطئة رقم 1 :
أول حاجه بنسمعها كتير أوي لحد دلوقتي إن الواحده لما تقص أطراف شعرها بيطول وبيتقل وطبعاً الكلام ده غلط لإن فيه حاجه الناس مش قادره تستوعبها إن الشعر بينمو بمعدل معين كل شهر, مفيش شىء ممكن تعملية أو ممكن تحطي شىء عليه تخليه يطول بسرعه, ومعدل النمو ده شىء وراثي ليه علاقه بالجينات فيه ناس شعرها يطول أسرع من ناس تانيه وليه علاقه كمان بالتغذية بس زى ما قلت انه معدل معين ومفيش اي شىء سحري يخلي الشعر ينمو بسرعة وقصه مش هيغير من شىء.
او أطراف شعرك متقصفه إنك تقصي شوية منه ده هيزود التقصف أكتر وهيخلي الشعر يتكسر فبالتالي لما الشعر يطول بالمعدل الطبيعي بتاعه هتشوفي فرق فى الطول مع الوقت.
أما لو شعرك متقصف وسبتيه متقصف أطرافه هتتكسر ولما هيطول مش هتشوفي فرق فى الطول لانه يادوب بيطلع شعر جديد وبيتكسر تاني من الأطراف, وفى الحاله دي فقط بيكون قص أطراف الشعر كويس ولكن مش هيخلي الشعر يطول زياده عن اللزوم ومفيش آي دراسة علمية أثبتت الكلام ده, وأكيد فيه طرق كتير زي الزيوت الطبيعيه الى بتحفز الشعر لما ندلك فروة الراس بيها وننشط الدوره الدمويه بس برده ده مش معناه ان الشعر هيطول 10 سم زياده.
وبالنسبه لكثافة الشعر كل واحده فيه على فروة راسها عدد معين من بصيلات الشعر ومن كل بصيله بيطلع شعر وكل مازاد عدد البصيلات زادت كثافة الشعر وبالتالي الشعر بيبان كثيف والموضوع ده برده ليه علاقه بالجينات وده معناه إنك لو إتولدتي بشعر خفيف ده معناه إن عدد بصيلات شعرك قليله وإنك تقصيه ده مش هيغير من شىء ومفيش آي حاجه هتزود بصيلات الشعر إلا الزيوت الطبيعيه أيضاً.
وعشان كده قص أطراف الشعر خطأ, قصي أطراف شعرك فقط لو متقصفه أو لو انتي عايزه تقصيه أو يكون على نفس المستوي.
المعلومة الخاطئة رقم 2 :
حاجه تانيه دايماً نسمعها إن لازم نغير شامبو البلسم ومنتجات الشعر الآخري عشان الشعر بيتعود عليها وبعد فتره مش بتجيب آي نتيجة, وطبعاً الكلام ده خرافه كبيره ومش مبني على آي أسس علمية, أصلاً الشعر مش بيتعود على شىء لإنه ميت, ولكن فيه ناس تحب تغير منتجات الشعر بس عشان دايماً تدور على المنتجات الأفضل لمجرد الفضول إنهم يغيروا شىء فى سبيل إنهم يلاقوا حاجه تانيه أحسن, ولو لقيتي منتجات كويسه وبتجيب نتائج إنتي حباها مانتيش مجبره إنك تغيريها خالص بس لما إحتياجاتك تتغير زي مثلاً إنك تصبغي شعرك أكيد وقتها شعرك هيحتاج ترطيب أكتر وشامبوهات مخصصه للشعر المصبوغ, ولما الرطوبة برده تزيد فى الجو بتحتاجي تدوري على منتجات تخلي الشعر أملس وأحلي, بس قصة إن شعرك يتعود على حاجه زى المناعه ده شىء غير منطقي وللأسف بنسمعه كتير, أهم شىء تهتمي بفروة راسك دايماً تعمليلها أقنعه وتقشير وتنضيف عميق زيها زي بشرة الوجه لازم تقشير وتنضيف عميق عشان يشيل آي رواسب بيسيبها الشامبو أو البلسم أو منتجات تصفيف الشعر الأخري لإن رواسب المنتجات فيها سليكون ومواد كيمياوية تانية بيخلي الفروة غير صحيه وبالتالي الشعر مابيكونش صحي بعد فتره ويمكن ده الى بيخلي الناس بعد إستخدام شامبو معين وبلسم لفتره يحسوا إن هم مش بيحصلوا على نفس النتيجه لإنهم مش بينضفوا فروة الراس كويس منها الرواسب الى بتسيبها المنتجات دي ومش بيعملوا تقشير لفروة الراس.
طبعاً فيه معلومات خاطئة كتير بنسمعها تخص الشعر والبشرة فحبيت النهارده أتكلم عن النقتطين دول بس عشان ماتزهقوش
هل أعجبك الموضوع ؟
مواضيع مشابهة :
ليست هناك تعليقات:
إرسال تعليق