النهارده هنتكلم عن موضوع الضغوط النفسية يارب يبعدنا ويبعدكم عنها لإن احياناً الضغوط النفسية متخليناش نحس بطعم اي حاجة حلوة وتخليك مخنوق وتعبان ومش مبسوط, مش حاسس طعم الفرحة وفي الاحزان متكتف ومربوط, الآن متوتر ودايماً مضغوط زادت مشاكلك وبهمومك دايماً مكبوت, عايش في الدنيا لكن جواك بتموت, حيران وتايه ورافض السكوت, بتتكلم وبتشكي لكن وصفك لشعورك مش مظبوط, تتعصب وتثور وفنفس الوقت مستسلم فحياتك لأي ضغوط.
جايز تكون حياتنا ماشية بننام وبنصحي وبنشتغل وبنخرج ونتفسح ونقابل قرايبنا واصحابنا وبنعمل كل حاجه ولكن فيه حاجه ناقصه مش عارفين ايه هي, ممكن نكون بنعمل كل حاجه بس بتوتر وقلق وضغوط نفسية ونقول اصلنا مضغوطين نفسياً, الضغوط النفسية ازاي نخرج منها عشان نستمتع بطعم اي حاجة حلوة فحياتنا هو ده موضوعنا النهارده.
معني مضغوط نفسياً :
هو الفكره زي ما قلنا ان انا مابقتش مستمتع في الطب النفسي كلمه شهيرة جداً اسمها انهيدونيا ومعناها بالعربي زي الانجليزي وهي بالمعني الحقيقي فقدان الاستمتاع بما كنت تستمتع بيه في الماضي بمعني ان بتخرج ؟؟ اه بخرج لكن مش مبسوط زي الاول, بتاكل اكله كويسة ؟؟ اه بس مش زي الآول, اشهر سبب لعدم الاستمتاع كما كنت من قبل هو وجود كرب والكروب النفسية والكروب الاجتماعية هم اشهر سبب فقدان الاستمتاع, ممكن يكون الواحد مايبقاش فاهم ان ده كرب يعني ممكن جداً تكون عايش حياة فيها كروب نفسية او ضغوط نفسية كتيرة جداً من غير ما تاخد بالك, والفكرة ان بيتم استنزاف الشخص تدريجياً ودي خطورتها.
انواع الضغوط النفسية :
ضغوط حاده : وكمثال ان مثلاً حد لاقدر الله ماتله, سقط في الامتحان, خسر فلوسة, اطلق, بمعني ان حصلت حادثه أثرت عليه, وطبعاً بعد الكارثة دي الانسان بيقعد تعبان شوية حسب قدرتة علي التعامل مع الضغوط بعد كده الدنيا بتمشي كويس.
ضغوط المستمرة : ودي الآخطر من الضغوط النفسية الحاده كمثال انت موظف في شركة ومديرك مش لطيف فبتشتغل مع حد انت مش حابه اوي بس ده كل يوم فده بيستنزفك كل يوم فبتكون جي مضايق, او كمثال آخر متجوزه واحد مش لطيف او عندك ابن مزعج, والانواع دي مش بتعمل كارثه لكن بالمعنى العام مش مريحك ولكن الضغوط المستمرة تأثيرها سئ جداً علي الانسان.
تأثير الضغوط النفسية علي الانسان :
هناخدها كمثال بسيط جداً, جرب تجيب ضفدغه وتحطها في ميه سخنه جداً هتلاقي الضفدعه نطت من الميه بسرعه اما لو حطيناها في ميه عاديه وبدأنا نسخنها بالراحه خالص هنلاقي ان الضفدعه بتموت من غير ما تاخد بالها, وهي نفس الفكره لما الانسان بيتعرض لكرب حاد جداً بيتفاعل وبيبدأ ياخد حظرة وياخد باله ويعيط علي الي مات ده وبعدين يبدأ علي قدر المستطاع الخروج من هذه الأزمه, لكن لما يكون الكرب مزمن وانا مش واخد بالي انه بيأثر فيا بالظبط زي نقطة الميه لما بتنزل علي الورقة نقطه ثم نقطه في الاول عادي جداً لغاية ما تدوبها خالص, فالكروب المزمنه بتأثر سلباً جداً علي مناعة الانسان وبالتالي وجود كرب مزمن بيجلب امراض جسديه وعضويه كتيره جداً, يعني الناس الي بيجيلها ضغط وسكر وكانسر ( سرطان ) كل دي ناس محطوطه تحت كرب مزمن, انا لو عندي استعداد لمرض السكر بيجيلي مرض السكر حتي لو لم اتعرض لاي كروب نفسية في حياتي, فأي حد عرضه لأي من هذه الاشياء بيبدأ يكون عصبي مخنوق مش قادر يعني قبل كدا كنت عادي مفيش داعي للعصبيه لكن دلوقتي بقيت عصبي جداً في الشارع, بتخانق مع اي حد بيكسر عليا, مابقتش متحمله الولاد, مابقتش متحمله زمايلى, اصبح رد فعلي مبالغ فيه, مع العلم ان انا ببقى عارف ان الموضوع مش مستاهل, والفكره ان انا ببقي عامل زي الاستك الي اشتد علي الآخر, والي عنده قلق برده بيبقي عنده انتيسيبيشن بمعني سئ الظن في الي جي بمعنى ان تفكيري مترواح بين الشغل هيبوظ, فلوسي هتخلص, دايماً في حالة قلق وتوتر حتي لو ماكنش فيه مؤشر لده, عشان مانخرجش من موضوعنا عدم التعامل مع الكروب النفسية المزمنه كارثه صحيه وكارثه نفسيه.
علاج الغضوط النفسيه:
الواحد كل شوية لازم يراجع نفسه ويسأل نفسه هو انا اخباري ايه ؟؟ هم الناس الي حوليا دول اخبارهم ايه ؟؟ مين فيهم كويس ؟؟ مين فيهم وحش ؟؟ مين فيهم مضايقني ؟؟ مين فيهم بيستفزنى ؟؟ مين فيهم وجوده فحياتي مضر ؟؟ طيب لو واحده مش مستمتعه في حياتها مع جوزها هل تتطلق ؟؟ لا طبعاً لازم نشوف الخلاف ده جي منين هل الضغط ده جي من اختلاف طباع ؟؟ هل الضغط ده هي مسؤله عنه ؟؟ لازم نعرف ان اي علاقة فاشله مسؤل عنها الاتنين ومش شرط يكون بين زوج وزوجه ممكن بين اتنين اصحاب بين اتنين اخوات وبالتالي هل هي عملت الي عليها في العلاقة دي ولا لأ ولو عملته طب هي عملته بالطريقة الصحيحه ولا لأ, ممكن لو عاملتني بأدب هعاملك بأدب, وممكن لو عاملتني بأدب اعاملك بقلة ادب القصد انه بيكون حسب الشخص, بمعني ان فيه شخصيات لما بتديلها مساحه من حياتك بتحتلك, وفيه شخصيات لما تديلها مساحه بتحترمك, فالفكره اني اقدر افهم الشخص الي قدامي اتعامل معاه ازاي فلو فيه مشكله مع زوجتي او والدي او امي او صاحب او اخ لازم اقعد مع نفسي واشوف المشكله فين هل المشكله فيه ولا فيا ولا في طريقة التعامل, هل محتاج اننا اغير الاستراتيجيه عشان خاطر الراجل ده ماينفعش اتكلم معاه بعنف ولازم اتكلم معاه بهدوء او العكس الراجل ده لازم اتكلم معاه بمنتهي الحزم عشان اقدر ارسم الخط, الفكره ان انا لما بلاقي نمط حياتي بيسبب اذي لازم اغير نمط حياتي مش لازم اغير نمط حياتي ان انا ارمي الناس من الشباك, مش لازم ان انا اهد البيت لا خالص لكن ممكن يكون فيه اساليب بسيطه تخلي الدنيا ألطف, فترتيب اولويات الانسان مهمه جداً بمعني ان فلانه لو قررت ان فلانه مهمه دي هتخليها من اولويات حياتها وهنراجع تاني علي موضوع الداي ايند ( day end ) مش ويك ايند الي اتكلمنا فيه في مواضيع سابقة بمعني ان فلانه عندها جوزها و5 اولاد ومسئولية بيت لكن عندها نفسها كمان ( فلانه ) فامفيش مانع ان من ضمن الـ 24 ساعه تبقي منهم ساعه واحده بتاعتها هي ساعه تعمل فيها الي هي عوزاه ومفيش شئ اسمه مفيش وقت لنفسي, لو قررت ان انت وجودك مع نفسك لمدة ساعة في نفس اهمية وجودك مع ابنك الي بيذاكر ولا ابنك الي عاوز ياكل, فهي علي حسب نسبة الاهمية بالنسبالك يعني انا لو حطيت اهمية الرياضة زي اهمية شغلك هلعب رياضة ويقلك مفيش وقت للرياضة لا انت مش حاتط اهمية, وعلي فكره محدش مجبر ابداً انه يعمل حاجه يعني مفيش حاجه اسمها مش هينفع افرح عشان خاطر العيال او اخرج او ارقص, هو فلان الميزه الوحيده الي فيه ان صوته حلو خلاص نخلي فلان يغني طول ما هو ماشي.
يارب تكونوا استفدتم ومستني آرائكم واستفساراتكم.
