عينى علينا يا شعوب عربية شعوب غلبانة ومبلية
ورؤسائنا من وسط الناس متنقية لاماّّ مجانين لامّا حرامية
فى تونس كان زين العابدين بيحكم البلد من سنين
ولا عنده زمة ولا عنده دين مخلاش ولا نسمة حرية
حكم بظلم واستبداد وسرق الزاد والزواد
ولو أى واحد كلمة زاد يصبح ورا القضبان الحديدية
ولمّا شعب تونس ثار وقامت ثورة الأحرار
على طول فر زى الفار يستنى حسنى فى السعودية
وفى ليبيا مجنون جربان بيضرب شعبه بالطيران
ويوصف شعبة بالجرزان مفروض يروح البورستان
عشان عقله اكيد تعبان مينفعوش غير مستشفى عقلية
دقل أعوزو برب الناس باين عليه معندوش احساس
قال ايه زعيم لكل الناس أسيا وأفرقيا وأمريكا الجنوبيّــــــــــة
اسمه الرئيس القزافى مجنون ويارب انت الشافى
موت بالجزم له مش كافى على ضربه للجماهير الليبية
الثورة قايمة فى كل مكان فى كل شارع وفى كل ميدان
شعب ثائر وغضبان ويقول عليهم همجية
وابنه كمان سيف الدولة يقصف عمره المولة
خدله فى الثوار جوله فى اليوم يقتل ييجى مية
يا رب يا عادل يا جبار انصر فى ليبيا الثوار
دا جدهم عمر المختار هزم الجيوش الايطالية
وفى مصر كان حسنى مبارك تلاتين سنة على قلبنا بارك
واولاده ومراته فى الحكم تشارك وكأنّ البلد دى وسية
حطه السادات على البلد قبطان وقال ده بطل من أبطال رمضان
وكان فى الحرب رئيس الطيران وصاحب الضربة الجوية
فى عشرين قصر هو ساكن وفى شرم الشيخ فى منتجع راكن
وشعبه مش لاقى أماكن يسكن حتى فى دورة مية
وكل شويّة يطلع ويقول اقضيكوا منين حتى فول
دى زيادة السكان زى الغول بتاكل كل التنمية
يا ناس اسمعوا الكلام وشدوا على بطنكوا الحزام
شوفوا بتاكلوا فول بكام لمّا خلصتوا الميزانية
والأكل يجيله باشارة تجيبه من برة الطيارة
والشعب مش لاقى بصارة أو شويّة فول أو طعمية
ابنه علاء ده الكبير شارك الغنى والفقير
من اسوان حتى أبو قير فى أى شركة أو حتى عربية
وابنه جمال كان راجل العصر معندوش غير اتناشر قصر
ومستنى عشان يحكم مصر ويكمّل قصوره المية
وصاحب جمال كان احمد عز كان طبال بيرقص ويهز
خلاه عن مهنته بيشز ويمسك زعيم الأغلبية
زى مكان ضابط ايقاع أصبح فى المجلس له أتباع
يحركهم برفعة صباع ويمشوا وراه المطبلاطية
وأصبح فى البلد راجل شديد واحتكر شركات الحديد
يرفع أسعاره وقت ما يريد ويكسب ملايين بالمية
جابلنا وزير خلاه وعلى أمن البلاد ولاه
حبس كل من وحد الله أو محلقشى دقنه كل صبحية
العدلى داير فى البلد بيرك لبيوت الفقرا يهدم ويدك
ولما طلعله الفيس بوك هرب زى الولية
ايامه كانت زى الهباب حفر سجون تحت التراب
حبس فيها اجمل شباب بمحاكم كلّها عسكرية
ولا بقى فيه قانون ولا دولة الحكم بس لأمن الدولة
لو حتى قلت لا حولة يقبضوا عليك فى الفجرية
وجبلنا أبو دم خفيف قواد وقال لقبه الشريف
فى جلب النسوان كان حرّيف فى المخابرات الحربية
البلد فى الفساد مغروسة والناس ماشية من الظلم مفروسة
ولو اتكلمنا قالوا دقلة مدسوسة وبتمونهم بلاد اجنبية
وبرلمان جاى مزور حتى الدستور كمان محور
عشان جمال يقعد وينور ويبقى رئيس للجمهورية
وأحكام كتيرة رايحاله ولكل التزوير كشفاله
ويقولوا ده سيد قراره لو حاكمة ضدة خمسين قضية
ورئيس مجلس راجل مغرور كله غضب ولقبه سرور
لو شفته دمى بيغلى ويفور وطلع كبير الحرامية
مولود ايّام حكم العثمان ورئيس مجلس من زمان
وكأن البلد ده خربان مجبشى زيه فى العقلية
وأعضاء كانت يادى العار للمخدرات فيهم تجار
وناس متخصصين فى لعب القمار وهربوا زمان من العسكرية
ومعارضة من غير شماتة شحتوا أحزابهم دى شحاتة
قاعدين زى خيال المآتة مكسبوش فى المجلس قضية
لو واحد من المعارضة قال يا عالم أنا عندى سؤال
فتحى يقول فيه جدول أعمال ومجهز ورقة ممضية
مجلس ايه محناش عارفين بيعملوا ايه وليه قاعدين؟
الظاهر أغلبهم كانوا رايحين علشان الشقة والعربية
وقلت يا مجلس غور هحرق وراك كيلو بخور
وخد معاك فتحى سرور ومعاه فتاويه القانونية
ورئيس وزارة راجل غلبان مسرقشى غير كام ميت فدان
وكام قصر وكام بستان وعمل جامعة كلية
والأراضى على بعضهم وزّعوها حتى البنوك كمان نهبوها
ومصانع البلد باعوها اللى بمليون بعوه بمية
يــــــاه كنت هنسى بطرس غالى وأنسى كل اللي جرالى
جوعنى وجوّع عيالى كان ماسك وزير مالية
سرق فلوسنا وجوعنا وطلع قانون ملوش معنى
عشان كمان يدفعنا فلوس للضرايب العقارية
والفساد زاد وانتشر غطى كمان كل البشر
فى كل المصالح اتحشر خاصتاً الجهات الحكومية
لو قلنا يا عالم الشعب تعبان مش لاقى حتى البيدنجان
يقولوا دول موالين لايران ويلفقوا لكل واحد قضية
والتعليم فى بلدنا غاب ولا فيه املا ولا حساب
ومدارس زى الهباب ولازم دروس خصوصية
والصحة صبحت تعبانه ومستشفياتنا كلها خربانة
مفيهاش حتى البرشامة عايز علاج ادفع نقدية
ونفقة الدولة للباشوات الوزرا وأولاد الزوات
والفقير لو حتى مات ميخدشى ورقة ممضية
وكترت فى البلد المتسولين وانضم عليهم الموظفين
والشباب فى البلد عطلانين وزادت اللصوص والبلطجية
ايه دا كله يا رب حوش سرقوا البلد ولا خلوش
لينا حتى شويّة قروش نعيش عيشة ولو ردية
أيام كانت زيى الطين لو قعدت أكتب عنها سنين
اكيد هنسى مسؤلين نشالين وحرامية
وجه يوم خمسة وعشرين من يناير وكّنا شايفين
شباب بلدنا متجمعين وعاقدين العزم والنية
ميرجعوا أبدا من الميدان غير بعد ميرحل الجبان
وتغور أيّامه وأيّام سوزان ويقضوا على حزب البلطجية
وعلى الأرض الدم سال دم الصليب ودم الهلال
وكل الفرق بيا زال بين الاسلام والمسيحية
لسة عايزين يا بهوات عايزين نشوف باقى البشوات
صفوت وسرور بالكلبشات واوعوا تنسوا الذكريات
هل أعجبك الموضوع ؟
مواضيع مشابهة :
ليست هناك تعليقات:
إرسال تعليق